ثالث تمرين من تمارين الحمل 👏
انهاردة هنتكلم عن تمرين كيجل( kegel) او تمرين قاع الحوض،
حقيقي دا من أهم التمارين في الحمل وبعد الولادة ومش بس كدا دا مهم لكل سيده في كل مراحل حياتها.
* كيجل هو العالم إللي شرحلنا إزاي التمرين دا بيتعمل.
التمرين دا أهميته إنه بيقوي عضلة الحوض☺️ ودي اللعضله الموجودة في قاع الحوض وفيها ٣ فتحات ( فتحة البول، فتحة المهبل وفتحة الشرج) وكل واحدة من الفتحات دي حواليها عضلة مستديرة علشان تتحكم في قوة الفتحه دي.
لازم نعرف كمان إن عضلة الحوض دي بتتأثر وبتتمدد بسبب وزن البيبي👶 ومن هنا تيجي أهمية اننا لازم نهتم بيها و نقويها كويس علشان تفضل قوية لأنها :
⏩ مسئولة في تحكمك في خروج البول يعني دورها كبير في منع السلس البولي.
⏩مسئولة عن عضلات مهبل قوية يعني علاقة حميمة أفضل.
⏩مسئولة عن عضلة فتحة الشرج إللي لما تكون قوية بتقلل احتمالية الإصابة بعدم التحكم او بالبواسير.
⏩العضله القوية بتشيل وزن البيبي أحسن وبتدعم وبتسند راسه وبيكون ليها دور كبير في إن رأس البيبي تاخد الوضع الجيد للولادة يعني تكون ذقن البيبي ناحية صدره وبكدا تدخل رأس البيبي الحوض بأقل قطر فتكون عامل كبير لتقدم الولادة بشكل جيد.
⏩ العضله القوية المطاطية بتساعد رأس البيبي إنها تطلع بأقل شق ممكن.
⛔ كيفية عمل كيجل:
أهم حاجة في التمرين دا إنك تقدري تحددي العضله دي وتتحكمي فيها علشان كدا ابدئي اعرفي العضله دي فين وازاي تتمكني من انقباضها بشكل جيد
⚀ وانتي في الحمام اثناء التبول امسكي البول يعني وقفيه شايفة الاحساس دا الانقباض دا علشان توقفي البول هي دي عضلة كيجل.
⚀ممكن تحطي صبعك داخل المهبل وتحاول تقبضي عليه العضلة دي هي كيجل.
خلي بالك اتأكدي إنك مش بتمسكي عضلات بطنك من تحت وركزي في عضلة الحوض.
بعد ما عرفتي فين العضلة كويس هنبدأ ندربها زي أي عضلة بالتدريج بس حبدأ ب 50 مرة متتخضيش مش حياخد منك اكتر من 5 دقايق.
ابدئي انك تقبضي وترخي العضله ٥٠ مره لمدة أسبوع وبعد كدا تقبضي وتمسكيه العضلة شوية ٣٠ ثانيه وبعدين وترخي أسبوع كمان.😉
تابعي الصور الموجودة علشان توصلي بالتدريج أسبوعيا لعلضله قوية.💪
أهم حاجة في تمرين كيجل إنك تفتكري تعمليه وأحلى حاجة في تمرين كيجل إنك ممكن تعمليه في أي وقت وأي مكان
متبطليش تعملي كيجل وانت بنت وانت حامل و بعد الولاده وحتى وانت كبيرة في ربيع العمر👵
ليست هناك تعليقات:
إرسال تعليق